ཨན་ཌོ་ཁ་པར་ཆེད་ལྒང་བཞུ་རྟོག་བཟོས་སྒེར་དྲ།

རྩོམ་ཡིག་འདིའི་ནང་དུ། རང་ཉིད་དྲ་མྱུལ་བྱེད་སྐབས་སེམས་འཚབ་བྱུང་བའི་གནད་དོན་ཁག་ཅིག་གླེང་འདོད། ང་ཚོས་དྲ་སྟེང་དུ་གནས་ཚུལ་མང་པོ་ཞིག་བརྗེ་ལེན་དང་བརྒྱུད་སྐུར་བྱེད་ཀྱི་ཡོད་ལ། སྲིད་གཞུང་དང་བཟོ་ལས་ཁང་སོགས་ལ་གནས་ཚུལ་དེ་དག་གི་ནང་དོན་ལ་ལྐོག་ལྟ་བྱེད་པའི་ནུས་པ་ཡོད་ལ། དྲ་ཇག་ཚོར་ཡང་དེ་མཚུངས་ཀྱི་འཇོན་ཐང་དང་ལག་རྩལ་ཡོད། མཛུབ་གནོན་ཐེངས་གཅིག་གིས་དྲ་སྟེང་དུ་ཡོད་ཚད་རག་ཏུ་འཇུག་ཐུབ་པའི་གོ་རིམ་དེའི་ཁྲོད་དུ། ང་ཚོས་སོ་སོའི་སྒེར་གྱི་གསང་རྒྱ་བློས་གཏོང་བྱེད་ཀྱི་མེད་དམ།

དེ་ན། ང་ཚོས་རང་ཉིད་ཀྱི་ངོ་བོ་དང་དྲ་སྟེང་དུ་བརྒྱུད་གཏོང་བྱས་པའི་གནས་ཚུལ་ཁག་སྲུང་སྐྱོབ་བྱེད་ཐུབ་བམ་ཞེ་ན། སྲུང་སྐྱོབ་བྱེད་ཐུབ་བོ།།

ང་ཚོས་དྲ་རྒྱ་བཀོལ་ཏེ། དྲ་སྟེང་དུ་ཆ་འཕྲིན་བསྡུ་ལེན་དང་། དྲ་ཐོག་ཏུ་དངུལ་གཏོང་ལེན། སྤྱི་ཚོགས་དྲ་བ་བཀོལ་སྤྱོད། དྲ་བརྙན་ལ་ལྟ་བ། གྲོགས་པོ་དང་ནང་མི་ལ་ཁ་བརྡ། དྲ་ལམ་དུ་ཉོ་ཚོང་སོགས་བྱེད་སྒོ་སྣ་ཚོགས་ཤིག་རྩོམ་ཐུབ་ལ། དེ་དང་དུས་མཚུངས་སུ་རང་ཉིད་མི་་སྒེར་གྱི་གསང་རྒྱ་སྲུང་སྐྱོབ་བྱེད་ཐུབ། རང་ཉིད་ཀྱི་གསང་རྒྱ་སྲུང་སྐྱོབ་བྱེད་ཐབས་ཀྱི་ལམ་ཁ་ནི་རྟོག་བཟོས་སྒེར་དྲ་ཡིན།

རྟོག་བཟོས་སྒེར་དྲ། རྟོག་བཟོས་སྒེར་དྲས། དྲ་རྒྱ་བཀོལ་སྤྱོད་བྱེད་པའི་སྐབས་སུ་ཁྱེད་ལ་སྒེར་གྱི་དྲ་བ་ཞིག་མཁོ་སྤྲོད་བྱེད་ཀྱི་ཡོད། དྲ་རྒྱ་ནི་རླངས་འཁོར་བརྒྱ་ཕྲག་མང་པོ་ཕར་འགྲོ་ཚུར་འོང་བྱ་སའི་་མྱུར་བགྲོད་གཞུང་ལམ་ཞིག་དང་མཚུངས་ལ། རྟོག་བཟོས་སྒེར་དྲ་བཀོལ་སྤྱོད་བྱེད་པ་ནི། གཞུང་ལམ་དེའི་སྟེང་གི་ཕུག་ལམ་གཞན་པ་ཞིག་གི་ནང་དུ་རླངས་འཁོར་གཏོང་བ་འདྲ་བས། གཞན་གྱིས་ཞིབ་ལྟ་བྱེད་དུས་ཕུག་ལམ་མཐོང་བ་མ་གཏོགས། ཕུག་ལམ་དེའི་ནང་དུ་འཛུལ་ཚར་བའི་ཁྱེད་རང་མཐོང་མི་ནུས།

རྟོག་བཟོས་སྒེར་དྲ་བཀོལ་སྤྱོད་བྱེད་དོན་གང་ཡིན།

གསང་སྡོམ།

རྟོག་བཟོས་སྒེར་དྲའི་ཁྱད་ཆོས་གཙོ་བོ་ཞིག་ནི། ཁྱེད་ཀྱི་དྲ་ཐོག་གི་བྱེད་སྒོ་ཁག་གསང་སྡོམ་བྱེད་ཀྱི་ཡོད་པ་དེ་ཡིན། ཁྱད་ཆོས་དེའི་དབང་གིས། ཁྱེད་ཀྱིས་དྲ་ཚིགས་གང་དག་ལྟ་ཀློག་བྱས་ཡོད་མེད་དང་། ཁྱེད་ཀྱིས་ཡིག་ཆ་གང་ཞིག་བརྒྱུད་གཏོང་བྱས་ཡོད་མེད་དྲ་བའི་ཞབས་ཞུ་མཁོ་སྤྲོད་བྱེད་མཁན་གྱིས་རྩ་བ་ནས་མཐོང་མི་ཐུབ་པ་བཟོ་གི་ཡོད། ཁྱེད་རང་དང་རྟོག་བཟོས་སྒེར་དྲའི་ཞབས་ཞུ་མཁོ་སྤྲོད་མཁན་གཉིས་ཀར་མ་གཏོགས་གསང་གྲོལ་གྱི་ལྡེ་མིག་མེད། དེར་བརྟེན། རྟོག་བཟོས་སྒེར་དྲའི་ཞབས་ཞུ་མ་ནོར་བ་ཞིག་འདེམས་རྒྱུ་གལ་ཆེ།

གཞི་གྲངས་སྲུང་སྐྱོབ། གསང་སྡོམ་གྱིས་ཁྱེད་ལ་དྲ་སྟེང་དུ་བསྡུ་ལེན་དང་བརྒྱུད་གཏོང་བྱས་པའི་གནས་ཚུལ་རིགས་སྲུང་སྐྱོབ་བྱེད་དུ་འཇུག་གི་ཡོད་ལ། དེའི་ཁོངས་སུ་དྲ་ལམ་གྱི་འབྲེལ་མཐུད་ཀྱང་ཚུད་ཀྱི་ཡོད། གསང་སྡོམ་བྱས་ཡོད་པའི་རྒྱུ་མཚན་གྱིས། ཁྱད་ཆོས་དེས་ཀྲུང་གོ་འགུལ་འཕྲིན། ཀྲུང་གོ་གློག་འཕྲིན། ཀྲུང་གོ་སྦྲེལ་འཕྲིན་སོགས་དྲ་བའི་ཞབས་ཞུ་མཁོ་སྤྲོད་མཁན་དང་། དྲ་ཇག ད་དུང་འཛད་སྤྱོད་པའི་ཆ་འཕྲིན་སྤྱོད་པར་དབང་ཆ་ཡོད་མཁན་གྱི་སྲིད་གཞུང་སོགས་བཀག་འགོག་བྱས་ཏེ། ཁྱེད་ཀྱི་དྲ་བའི་ལམ་ཁའི་ནང་དུ་ལྐོག་འཛུལ་བྱེད་མ་ཐུབ་པ་བཟོ་གི་ཡོད། ཁྱེད་ཀྱིས་དྲ་ཚིགས་བརྟན་པོ་ཞིག་གི་སྟེང་དུ། ཁྱེད་ཀྱི་མིང་དང་། གསང་གྲངས། ཁ་པར་ཨང་གྲངས། དངུལ་ཁང་གི་ཨང་གྲངས་སོགས་ཡར་འཇུག་བྱེད་སྐབས། རྟོག་བཟོས་སྒེར་དྲ་བཀོལ་ན། དེས་ཁྱེད་ལ་བདེ་འཇགས་ཀྱི་རིམ་པ་འཕར་མ་ཞིག་སྤྲོད་ངེས།

སྡོད་གནས་སྦ་གསང་། རྟོག་བཟོས་སྒེར་དྲས་ཁྱེད་ཀྱི་སྡོད་གནས་གང་ཡིན་མིན་ཁྱེད་ཀྱིས་ལྟ་ཀློག་བྱ་སའི་དྲ་ཚིགས་ཁག་དང་། ཁྱེད་ཀྱི་དྲ་བའི་ཞབས་ཞུ་མཁོ་སྤྲོད་མཁན་ལ་མཐོང་དུ་མི་འཇུག ཁྱེད་ཀྱིས་རྒྱུན་ལྡན་གྱི་དྲ་རྒྱ་བཀོལ་ཏེ་དྲ་ཚིགས་ཤིག་ལྟ་ཀློག་བྱེད་སྐབས། དྲ་ཚིགས་གང་དེའི་ཞབས་ཞུ་མཁོ་སྤྲོད་བྱེད་མཁན་གྱིས་ཁྱེད་རང་གང་དུ་ཡོད་མེད་ཤེས་ཐུབ། འོན་ཀྱང་། རྟོག་བཟོས་སྒེར་དྲ་བཀོལ་སྐབས། ཁོང་ཚོས་ཁྱེད་ཀྱི་བཀོལ་བཞིན་པའི་རྟོག་བཟོས་སྒེར་དྲའི་དྲ་བའི་ཞབས་ཞུ་ཆས་ཀྱི་ས་གནས་མཐོང་གི་ཡོད། ཁྱེད་ཀྱིས་དྲ་བའི་ཞབས་ཞུ་མཁོ་སྤྲོད་བྱེད་མཁན་གྱིས་ཁྱེད་རང་རྟོག་བཟོས་སྒེར་དྲ་ཞིག་ལ་མཐུད་ཡོད་པ་མ་གཏོགས། ཁྱེད་ཀྱིས་དྲ་ཚིགས་དང་དྲ་ཐོག་གི་སྡིངས་ཆ་གང་དག་ལ་ལྟ་ཀློག་བྱེད་ཀྱི་ཡོད་མེད་མཐོང་མི་ཐུབ།

བཀག་སྡོམ་བྱས་ཡོད་པའི་ཆ་འཕྲིན་དང་དྲ་ལམ་གྱི་སྡིངས་ཆ་ཁག་སྤྱོད་ཐུབ། རྟོག་བཟོས་སྒེར་དྲས་བར་མི་ལྟ་བུའི་ངོ་བོའི་ཐོག་ཁྱེད་རང་དང་ཁྱེད་ཀྱིས་ལྟ་ཀློག་བྱ་སའི་དྲ་ཚིགས་དང་། ཁྱེད་ཀྱིས་བཀོལ་སྤྱོད་བྱ་སའི་སྡིངས་ཆ་སོགས་ཀྱི་བར་དུ་དྲ་བའི་ལམ་ཁ་དམིགས་བསལ་ཞིག་བསྐྲུན་གྱི་ཡོད་སྟབས། ཁྱེད་ཀྱིས་དྲ་ཐོག་གི་ཆ་འཕྲིན་ཡོད་དོ་ཅོག་ལ་ལྟ་ཀློག་བྱེད་ཐུབ་པ་མ་ཟད། དྲ་སྟེང་གི་སྡིངས་ཆ་ཡོངས་རྫོགས་བཀོལ་ཐུབ། རྟོག་བཟོས་སྒེར་དྲས་ཁྱེད་རང་དྲ་རྒྱ་བཀག་སྡོམ་ལ་གཡོལ་དུ་འཇུག འོན་ཀྱང་། ཤེས་དགོས་པ་ཞིག་ལ། ཁྱེད་ཀྱིས་ངོ་བོ་སྦ་གསང་བྱེད་མི་ཐུབ་པས། ཚད་ལྡན་མིན་པའི་རྟོག་བཟོས་སྒེར་དྲ་བཀོལ་ན། ཁྱེད་ཀྱིས་ཕྱི་ཕྱོགས་ཀྱི་དྲ་ཚིགས་ཁག་ལ་ལྟ་ཐུབ་ངེས་ཀྱང་། སོ་སོའི་བདེ་འཇགས་ཤོར་བའི་ཉེན་ཁ་ཆེ།

ལྒང་བཞུ་སྒེར་བཟོས་སྒེར་དྲ་བཀོལ་དགོས་དོན་གང་ཡིན། ལྒང་བཞུ་ནི་སྤྱོད་བདེ་བ་མ་ཟད། རྙོག་གླེང་གང་ཡང་མེད་པའི་རྒྱལ་སྤྱིའི་ནང་གི་མཉེན་ཆས་ཚད་ལྡན་ཞིག་ཡིན། མཉེན་ཆས་དེ་ལ་རིམ་པ་གཉིས་ཡོད་དེ། རིམ་པ་དང་པོ་དེ་རིན་མེད་ཡིན། ཟླ་རེརེ་རིན་མེད་ཀྱིས་ཐོག་ནས་དྲ་རྒྱ་500MB ཙམ་བཀོལ་ཆོག གལ་ཏེ། ཁྱེད་ཀྱིས་ཚད་བཀག་གང་ཡང་མེད་པའི་ཐོག་ནས་དྲ་རྒྱ་སྤྱོད་འདོད་ཚེ། མཉེན་ཆས་འདིའི་ནང་གི་རིམ་པ་མཐོ་བ་དེར་ཟླ་རེརེ་དམངས་སྒོར་¥ 430/-ཙམ་སྤྲད་དེ་ཉོས་ཆོག མཉེན་ཆས་འདིའི་དྲ་བའི་ཞབས་ཞུ་ཆས་ཨ་རི་དང་རྒྱ་གར་ན་ཡོད། ལྒང་བཞུ་གང་ནས་ཕབ་ལེན་བྱེད་དགོས།

རྒྱལ་ནང་གི་ཀུ་ཤུ་བིམ་མཛོད་ནང་དུ་ཚད་ལྡན་གྱི་རྟོག་བཟོས་སྒེར་དྲ་གང་ཡང་མི་རྙེད། ཨན་ཌོ་ཁ་པར་བཀོལ་མཁན་ཚོས་མཉེན་ཆས་བཟོ་སྐྲུན་བྱེད་མཁན་གྱི་དྲ་ངོས་ནས་ཚད་ལྡན་གྱི་མཉེན་ཆས་རིགས་ཐད་ཀར་ཕབ་ལེན་བྱེད་ཐུབ། ཀུ་ཤུ་བཟོ་ཚོང་ཁང་གི་ཐག་གཅོད་ལ་འགྱུར་བ་མ་ཕྱིན་བར་དུ། ཁ་པར་སྤྱོད་མཁན་ཚོར་ཕབ་ལེན་གྱི་གདམ་ག་མེད། གང་ཡིན་ཞེ་ན། སྲིད་གཞུང་གིས་བཀག་འགོག་བྱེད་ཀྱི་ཡོད་པས་སོ།།

ཨན་ཌོ་ཁ་པར་ནང་དུ་ཕབ་ལེན་དང་ནང་འཇུག་བྱེད་སྟངས།

གོ་རིམ་དང་པོ། གོ་རིམ་དང་པོ། ཁྱེད་ཀྱི་ཁ་པར་སྟེང་གི་དྲ་རྒྱ་བཤེར་ཆས་ཀྱི་ནང་དུ། གཤམ་གྱི་དྲ་ཚིགས་འདིའི་ཁ་བྱང་གཏགས་དགོས། https://s3.amazonaws.com/ganglha.net/apk/lantern-installer+.apk

གོ་རིམ་གཉིས་པ། འབྲེལ་ཐག་དེས་ཁྱེད་ལ་ལྒང་བཞུ་བཀོལ་ཆས་ཐད་ཀར་ཕབ་ལེན་བྱེད་དུ་འཇུག་གི་རེད། （Download/下载）ཕབ་ལེན་གྱི་ཐོག་ཏུ་མནན་ཚེ། ཨན་ཌོ་ཁ་པར་ནང་དུ་ཕབ་ལེན་བྱེད་འགོ་རྩོམ་ངེས། གོ་རིམ་ལྔ་པ། “OK” ཐོག་ལ་མནན་ཚེ། ཕབ་ལེན་འགོ་འཛུགས་བྱེད་ངེས།

གོ་རིམ་གསུམ་པ། ཕབ་ལེན་གྲུབ་མཚམས།ནང་འཇུག་གི་ཐོག་ལ་ནོན། མ་ལག་གསར་སྣོན་བྱས་རྗེས་ནང་འཇུག་བྱེད་དགོས་སྲིད།

གོ་རིམ་བཞི་པ། དེ་ནས（Install/安装）ནང་འཇུག་གི་ཐོག་ལ་མནན་ཚེ། མཉེན་ཆས་ནང་འཇུག་གི་འགོ་རྩོམ་ངེས།

གོ་རིམ་ལྔ་པ། ནང་འཇུག་བྱས་ཚར་ན། ལྒང་བཞུ་VPN འབྲེལ་མཐུད་བྱེད་ཆོག་པའི་རེ་བ་འདོན་སྲིད། དེ་ལ་ངོས་ལེན་(允许) གནང་དགོས། དེ་ནས་ འཆར་ངོསདཀྱིལ་གྱི་མཐེབ་ཅུས་དེ་གཡས་ཕྱོགས་སུ་དེད་ནས་VPN བཀོལ་སྤྱོད་བྱེད་འགོ་ཚུགས།

གོ་རིམ་དྲུག་པ། གལ་ཏེ་ཁ་དོག་སྔོན་པོར་གྱུར་ཚེ་ལྒང་བཞུ VPN་ལ་སྦྲེལ་ཚར་བ་མཚོན་ལ། VPN ལ་སྦྲེལ་ཡོད་ན། རྒྱལ་ཁབ་གང་བརྒྱུད་ནས་འབྲེལ་མཐུད་བྱས་ཡོད་མེད་ཀྱང་མཐོང་ཐུབ། ལྒང་བཞུ་ཡིས་རང་འགུལ་གྱིས་ཁྱེད་རང་གི་སྡོད་གནས་ལ་གཞིགས་ཏེ་ཆེས་བཟང་བའི་དྲ་བའི་ཞབས་ཞུའི་ཆས་ཤིག་འདེམས་ཏེ་དྲ་སྦྲེལ་བྱེད་ངེས་ཡིན།འབྲེལ་མཐུད་བྱས་ཚར་ན། འཆར་ངོས་ཀྱི་བརྡ་རྟགས་ཀྱི་ཉེ་འགྲམ་དུ། ལྡི་མིག་གི་རྟགས་ཤིག་གམ VPN ཟེར་བའི་ཡི་གེ་གསུམ་དེ་མཐོང་ཐུབ། དེ་ནས་ཁྱེད་ཀྱིས་བཀག་སྡོམ་བྱས་ཡོད་པའི་དྲ་ཚིགས་ཁག་ལ་ལྟ་ཀློག་བྱེད་ཐུབ། བཀོལ་སྤྱོད་བྱས་ཚར་ན། གཡོན་ཕྱོགས་སུ་འདེད་དགོས།

གོ་རིམ་བདུན་པ། གལ་ཏེ་བཀོལ་ཆས་ཀྱི་སྐད་ཡིག་དེ་དབྱིན་ཡིག་ནང་ཡོད་ཚེ། ཁྱེད་ལ་སྐད་ཡིག་བརྗེ་ཆོག་པའི་གདམ་ག་ཡོད། འཆར་ངོས་གཡས་ཕྱོགས་ཀྱི་འོག་གི་ཐོ་ཁོངས(Account/账户’) ལ་མནན་རྗེས། འཆར་ངོས་ཀྱི་ཐོ་གཞུང་གི་ཁྲོད་ནས་སྒྲིག་འགོད”settings/设置”ལ་གནོན་དགོས།

གོ་རིམ་བརྒྱད་པ། ‘སྒྲིག་འགོད་ཀྱི་ནང་ནས་སྐད་ཡིག་(Language/语种)་རང་ཉིད་ལ་སྟབས་བདེ་བའི་སྐད་ཡིག་དེ་འདེམས། དོ་སྣང་དགོས་པ་ཞིག་ལ། ད་ལྟའི་ཆར་ལྒང་བཞུའི་ནང་དུ་བོད་སྐད་ཀྱི་གདམ་ག་མེད། འོན་ཀྱང་། གལ་ཏེ་ཁྱེད་ལ་རྒྱ་སྐད་སྟབས་བདེ་ན། རྒྱ་ཡིག་གི་གདམ་ག་ཡོད།

གོ་རིམ་དགུ་པ། ལྒང་བཞུའི་ནང་དུ། དྲ་རྒྱ་བཤེར་ཆས་ཤིག་ལོགས་སུ་བཀོལ་སྤྱོད་བྱེད་མ་དགོས་པར། འཛད་སྤྱོད་པ་ཚོས་ཡར་འཇུག་བྱས་པའི་བརྙན་དང་པར་སོགས་འཚོལ་ཞིབ་བྱེད་ཆོག་པའི་གདམ་ག་ཡོད། ལྒང་བཞུ་ཡིས་ཁྱེད་ཀྱིས་འཚོལ་ཞིབ་གང་བྱས་ཡོད་མེད་གསང་བ་ཉར་ངེས་ལ། འཚོལ་བཤེར་གྱི་གཞི་གྲངས་ཁག་ཕྱོགས་གསུམ་པར་མཉམ་སྤྱོད་བྱེད་མི་སྲིད།

གཞན་ཡང་། ཁྱེད་ཀྱིས་ལོ་རེར་རྒྱ་སྒོར་ ༣༥༠ ཡས་མས་ཤིག་སྤྲད་ཚེ། ལྒང་བཞུའི་གནས་རིམ་སྤར་ཆོག་པའི་གདམ་ག་ཡོད། དེ་ལྟར་བྱས་ན་དྲ་ཤུགས་སྔར་ལས་མགྱོགས་སུ་གཏོང་ཐུབ་པ་དང་། ལྒང་བཞུ་ཞབས་ཞུ་མཁོ་འདོན་བྱེད་མཁན་གྱིས་འཛད་སྤྱོད་པའི་གཞི་གྲངས་གང་ཡང་ཉར་ཚགས་མི་བྱེད་པའི་ཁྱད་ཆོས་ཡོད།